Elkarrekin Podemos taldeak udal hauteskundeen balorazioa egin du gaur. Kanpainan zein hauteskundeen ondoren “zuhurki, modu arduratsuan eta erantzukizunez” jokatu dutela diote taldetik, eta aldaketaren alde azaldu diren alderdiei, hau da, EAJ eta EH Bilduri, hala egin ez izana leporatu diete. “Egoera argitu egin da, eta orain badakigu zeintzuk diren gure benetako aukerak. Eta horien arabera jokatuko dugu hemendik aurrera”, adierazi du Miren Echeveste idazkari nagusiak.
Azken egunotan PSE-EE, EAJ eta EH Bilduk hartutako papera kritikatu dute formazio moretik, hiriko politikariek erabaki beharrean goitik iritsi zaiela agindua. “Erabakitzeko eskubidea aldarrikatu behar dugu, baina hasi gaitezen gure alderdietan eta Irunen ere egiten”, dio David Soto alkategaiak.
Era berean, aldaketaren aldeko apustua berretsi du taldeak, eta datozen lau urteotan beharrezko aldaketa horiek lortzeko lanean jarraituko dutela dio alkategaiak. “Herritarrek utzi gaituzten posizio honetan uste dugu aldaketak lortzeko nahikoa indarra eta ahalmena dugula”. Horri lotuta, aldaketa horiek emateko Elkarrekin Podemos “berme erreal bakarra” dela nabarmendu du Sotok.
EAJk alkatetzari uko egin ostean, eta agertoki politiko honen aurrean, datorren larunbatean (hilak 15) bere burua alkatetzara aurkeztuko duela azaldu du David Sotok. Ezinezkoa dirudien arren, EAJ eta EH Bilduri esker, alkatetza kendu diezaioke Santanori formazio moreko buruak.