EH Bilduk joan den igandeko hauteskundeetan koalizio subiranistari botoa eman zioten irundarrak eskertu nahi izan ditu. «EH Bildu indartuta atera da igandeko hauteskundeetatik: inoizko parte hartzerik apalarekin ere botoetan gora egin genuen, baita legebiltzarkide kopuruan ere, EH bildu ezkerreko alternatiba sendoa dela erakutsiz», adierazi dute taldetik. Orotara, 3.764 boto jaso zituen Maddalen Iriarteren hautagaitzak. Orain dela lau urte baino 384 boto gehiago jaso dituztela gogoratu dute, boto guztien %17,06a.
Emaitza hori koalizioa osatzen duten kideen lorpena izan dela diote harro, koalizioak Irunen duen «komunitate zabalaren» erakusle. Bereziki gazteak eskertu eta zoriondu nahi izan dituzte, «egindako lan paregabeagatik».