Etxegabeziari aurre egitea eskatu du EH Bilduk Irunen

IRUN – Azken asteetan ezagututako kaleratze arriskuan dauden irundarren kasuen harira, Irungo EH Bildutik "kaleratzei aurre egiteko plan integral bat" lantzea eskatu diote Udalari. Taldetik atzo ziotenez, azken boladan ezagututako kasuak "ez dira salbuespenak, ez dira kasu isolatuak". Kasu konkretuetan Udalak bitartekaritza lanak egitea "begi onez" ikusten badu ere, Irungo EH Bilduk tokiko administrazioak horretara mugatu ezin dela uste du. "Duela hilabete eta erdi sinatu zen ustezko gobernu akordio aurrerakoia Irunen. Orduan esan genuen ezkerreko politikak egiteko ez zuela balio eta zoritxarrez azken egunetan bizitako honek hori berresten du", jarraitzen zuen taldearen oharrak. Ildo berean, 2020an aurrekontuetarako EH Bilduk Gobernuarekin adostu zuen akordioa etxebizita ardatz zuela gogorarazi zuten taldetik. Beraz, "Irunen inork kalean lo egin ez dezan", EH Bilduk etxebizitza duina hiriko politiken oinarri gisa kontuan hartzea eskatu zion Udalari.