Irungo Udalak enplegua sustatzen jarraitzeko Lanbideren 475.677,42 euroko laguntza bat eskuratu du. Hala iragarri du gaur goizean Nuria Alzaga lehen alkateordeak eta Bidasoa Bizirikeko presidenteak. Alzagaren arabera udalak enplegu “berritzailea” sustatzearen aldeko apustua egiten jarraitzen du, “profil kualifikatuen kontratazioa indartuz”.

Lanbidek bideratutako diru kopurutik 373.441,81 euro Irungo Udalak zuzenean kudeatuko dituen kontratuetara bideratuko dituzte, eta era horretan, 30 udal langile berri kontratatuko dituzte, Bidasoa Bizirikek hiru langile berri hartuko ditu plantillan, eta hirugarren sektorean bost pertsona berrirentzako lanpostuak sortuko dituzte.

Orotara 38 kontratazio berri egingo dituzte. Gehienek 6 hilabeteko kontratua izango dute eta lanaldi osokoak izango dira. Helburua langabeen enpleagarritasuna handitzea da. Kontratu horiek aurten egitea aurreikusi dute, abenduaren 31 baino lehen.

Irungo Udalak hamazazpi administrari laguntzaile (Administrazio, digitalizazio, Katalogazio eta Tramitazio lanetan eta abarretan laguntzeko), lau teknikari (Gizarte Zerbitzuetarako, Kulturarako eta Mugikortasunerako), sei langile (Udaltzaingorako, Kulturarako eta Obra arlorako), kapataz bat (Bide publikoan lanak egiteko), eta bi laguntzaile (Biltegirako) kontratatuko ditu.

Gainontzeko 99.400 euroak udalerriko enpresen kontrataziora bideratuko dituztela iragarri dute. Diru kopuru horrekin gutxienez hamaika kontratazio berri finantzatu ahal izango dira eta horien luzapena 3 eta 6 hilabete artekoak izango dira.

Gazteen kontratazioa

FSE Plus programari esker Lanbidek 107.454,43 euro eman dizkio Irungo Udalari 12 hilabeteko hiru lan postu sortzeko. Kasu honetan, udalak erdi mailako bi teknikari eta administrari bat kontratatuko ditu. Horiek Lanbiden eta Gazte Bermearen Sisteman izena emanda dauden 16 eta 30 urte bitarteko gazteentzako izango dira.

Udako bigarren hilabeteko datuak helarazi ditu Bidasoa Bizirikek. Nuria Alzaga Bidasoa Bizirikeko presidenteak adierazi duenez oso pozik daude jaso berri dituzten datuekin. Izan ere, okupazio datu altuek eta bisitarien aniztasunak Irun “helmuga erakargarria eta irisgarria” dela erakusten duela adierazi du.

Uztailean Irungo hotel okupazioa %96koa izan da; hau da, iaz baino puntu bat altuagoa. Jatorriari dagokionez, iaz lo egiten geratu zen %75a Euskal Herrikoa, Espainiako estatukoa zein Herrialde Katalanetakoa zen, eta %25a atzerritarrak ziren. Aurten, berriz, aldaketa bat eman da. Bertan lo egitera geratu diren Euskal Herritarren, Espainiako estatukoen zein Herrialde Katalanen bisitarien kopurua %57ra jaitsi da eta atzerritarrena, berriz, %43 igo da. Batez besteko egonaldiari dagokionez bi gaukoa izan da pertsonako.

Orain artean, kultura eta katura ondarea kontserbatzera era hobetzera bideratutako ekintzak inplementatu dituztela jakinarazi du Alzagak, eta horiek beren fruituak eman dituela ziurtatu du: “Jasangarritasunarekin eta irisgarritasunarekin konprometitutako turismo helmuga adimendun gisa finkatu da”.

Turismo bulegoari dagokionez 1579 pertsona artatu dituzte azken hilabetean. Horietatik 151 telefono edo posta elektroniko bidez izan dira. Bulegoan jasotako bisitarien jatorriari dagokionez gehienak, Espainiako estatutik eta Herrialde Katalanetatik etorritakoak ziren. Baina, bisitari frantsesak, ingelesak, alemaniarrak eta italiarrak ere bertaratu dira.

Kontsulta motei dagokienez %34a informazio orokorra, mapak, liburuxkak eta ondareari buruzkoak izan dira. Ondoren, agenda, jai eta ekitaldiei buruzkoak kontsultak egin dituzte (%21). Familia turismoari buruzko informazioa %10 ingurukoa izan da, bisita gidatuei buruzkoa, berriz, %5-%6 artekoa eta informazio gutxien eskatu dutena: Done Jakue bideari, enogastronomiari eta naturari buruzko informazioa.