Eraiki Dantza Taldea otsailaren 24ean Irunen ospatuko den Iñude eta Artzaien konpartsa antolatzen hasi da dagoeneko. Desfilearen nondik norakoak zehazteko asmoz taldeak bilera bat antolatuko du urtarrilaren 13an. Bilera Behobiako auzo elkartean egingo da, eguerdiko 12:00etan. Bertan, dantzariek izena eman ahalko dute eta konpartsa osatzen duten pertsonaiak banatuko dira.

Iñude eta Artzaien eguna otsailaren 24ean ospatuko da Irunen. Urtero moduan, Irungo kale nagusiak zeharkatzen dituen desfile honetan, adin guztietako dantzariek parte hartu dezakete. Iñude eta artzaiak ez dira desfileko pertsonai bakarrak, mediku, erizain, apaiz eta baserritarrak ere ezinbestekoak baitira. Urtarrilaren 13ko bileran konpartsaren izen ematea irekiko da eta inskripzioa desfilean parte hartzeko interesa duten guztientzat zabalik egongo da.