Euskararen Eguna kulturari lotuta eta kalean ospatuko du gaur Irunek

Euskararen Nazioarteko Eguna dugu gaurkoa. Nahiz eta honen inguruan aurreko eta ondorengo asteetan zehar zabaltzen den ekitaldi programa, abenduaren 3 honi begiratzen dio zuzen iparrorratzak. Ospakizuna merezi duen eguna da eta horrela ulertu du ere Udalak. Astearte arrunt bat ez dela nabaritu dadin, hainbat ekitaldi antolatu ditu Euskara Arloak.

Urdanibia plazak hartuko du gaur protagonismo handia. Hamarretan hasi eta arratsaldeko zazpiak arte Bitamine eta Udalak antolatutako ekitaldia burutuko da 'Euskara eta Euskaraldiaren inguruan Bizipenak eta Desioak Elkarbanatzeko Aukera' izenburupean. Plazan bertan, eta aurrekoa itxi baino lehen, 18:00etan Hika antzerki taldea eta Oinkari dantza taldearen 'Sagartu' ikuskizun koloretsua eskainiko da. Azkenik, Amaia KZn, 19:30ean, 'Soinujolearen semea' filmearen proiekzioa egingo da eta ondoren, pelikularen zuzendaria den Fernando Bernués-ek solasaldi batean parte hartuko du jardunaldia amaitzeko.

Horrez gain, gaurko egunari begira, Irungo Udalak talde politiko guztiek babestutako adierazpen instituzionala ezagutzera eman zuen atzo 'Bide berriak, modu berriak. Ongi etorri etorkizunera!' titulopean.

«Jauzika dator euskara. Jauzika mendez mende. Jauzika egunez egun. Bihotzetik bihotzera jauzika. Eta, batez ere, ezpainez ezpain jauzika. Bere eguna du gaur euskarak, Nazioarteko Eguna hain zuzen ere. Baina ongi asko dakigu euskal herritarrok eta euskal hiztunok gaur ospa-tzen duguna ez dela egunaren mugetara errenditzen. Jauzi egiten du euskarak egunaren mugez gaindi ere. Jauzi egiten du euskarak muga guztiez gaindi, gure ahoan bizi-bizi, gure belarrietan zernahitarako prest beti. Noranahiko euskara gurea, denona. Zer genuke, bestela, gaur ospatzeko? Bide luzea egina du euskarak, eta harekin batera euskal hiztunok eta euskaltzaleok, etorkizuna irabazteko etengabeko ahaleginean. Bide luzea du egina euskal gizarteak euskara plaza guztietara duintasun osoz eramateko. Eta asko lortu da. Jardunak berak erakutsi digu, erakusten digu egunero, ezinbestekoa dela bide horiek, gauzak egiteko moduak, etengabe eguneratzea, eraberritzea, irudimenez biziagotzea. Eta argi erakusten ari gara euskalgintzan ari garen guztiok prest gaudela, eta gogotsu, irakaspena barneratzeko eta praktikan mamitzeko.

Jarduerak adostu ditugu. Diagnostikoak hurbildu ditugu. Ekimenak josi ditugu elkarrekin. Elkarrekin ebaluatu dugu egindakoa. Elkarrekin hobetuko dugu hobetu beharrekoa. Eta gizarteak erantzun sendoa eman du, onetsiz euskararen erabilera era iraunkor eta argian handiagotzeko estrategia eta molde berriak.

Badugu, bai, zer ospaturik aurtengo Euskararen Nazioarteko Egun honetan ere. Ezagutzen ez genuen modu batean aktibatu zituen iazko gizarte-ariketa arrakastatsuak euskal hiztunak, neurri batekoak nahiz bestekoak. Aktibatu zituen, baita ere, herri aginteak eta askotariko gizarte-erakundeak, ikuspegi berri batetik. Eta, batez ere, estrategiak eta diskurtsoak eraberritzeko joera eta prestasuna aktibatu zituen. Aldekotasuna, horrela, konpromiso eragingarri eta praktiko bihurtzeko bidean jarri zen. Badator, hurbileko oster-tzean, ekimen haren jarraipena. Euskaraldia berraktibatuko dugu, berriz ere denon arteko adostasun eta lankidetzan, eta hurrengo urteko Euskararen Nazioarteko Egunak izango du, ezinbestez, toki propioa ariketa sozial erraldoi horren ingurumarian. Ez da, baina, horretara mugatzen euskararen erabilera areagotzeko eginahala. Ezin inola ere horretara mugatu. Alorrez alor landu beharra dago erabileraren landarea, sendo haz dadin.

Ugari dira berariazko lanketa eskatzen duten alorrak, eta horien guztien artean bada bat gizarte-bizi-tzaren gune-gunean dagoena: ekonomia, lana eta kontsumoa biltzen dituen arloa, hain zuzen ere, gizartearen eta herritarron bizitzaren motore nagusia baita. Arlo sozioekonomikoak eta euskararen erabilerak elkarri egin behar dioten ekarriaren garrantzia ez da gutariko inorentzat ezezaguna. Bai baitakigu ez dela hizkuntza normalkuntzarik lanaren, ekonomiaren eta kontsumoaren munduan erro sakonik ez duenik. Sendoak dira, alor horretan ere, eragile nagusiak egiten ari diren urratsak. Eta horietan lehena, zalantzarik gabe, euskararen erabilera askotariko erakundeen izaeraren ezaugarrien artean txertatzea dago. Bide berriak, modu berriak, arlo sozioekonomikoan ere.

Estrategia berriak, beraz. Konpromiso berriak. Konpromisoari eran-tzuteko molde berriak. Praktika berriak. Azken batean, aldekotasun eraldatzailea da gure gizartea, euskal hiztunok eta euskaltzaleok aktibatuz, bideratzen ari dena. Bertan du euskarak etorkizuna. Bide eta prak-tika berrietatik datorren etorkizuna. Ongi etorri etorkizunera».