Dark Red Team argazki taldeak Meazuri Meakako meatzea protagonista den argazki erakusketa jarriko du Kabigorrin ostegun honetan eta apirilaren 27ra arte egongo da ikusgai.
Raul Martinezen argazkiak dira eta ingurumena berreskuratzeko proiektu fotografiko gisa landutako lana da. Meakan dauden meategi hauek bisitatu nahi zituen Martinezek eta meategiaren barruko argazki sorta bat egitea. Horrela, XX. mendean leku kobazulo honetan nola lan egiten zen irudikatu nahi izan du.
Horretarako, Dark Red Team argazki elkarteko kideak, hilabete batzuk barruan aritu ziren lanean. Proiektu hau gauzatzea ez da lan samurra izan: “argazki material ugari sartu behar izan dugu, baita eskalada eta segurtasun ekipoak, kanporatzeko urpekaritza ekipoak, etab. Eskaladan eta espeleologian espezializatutako langileen laguntza ere izan genuen, Elkarteko kideak gai honetan esperientziarik gabekoak baitziren”.
Kabigorriko erakusketan egindako lanaren laburpenarekin egingo du topo ikusleak. Orotara 300 metrotan murgildu ziren argazkilariak eta egun meatzea nola dagoen ikusteko baliagarriak dira. Izan ere, orain ere bertako jardueraren aztarnak segitzen dute.