Datorren ostegunerako (hilak 19), Irungo Kabigorri Ateneoak DokuForum-a antolatu du. 19:30ean emango diote hasiera. Antolatzaileek adierazi dutenez, eztabaidaren helburua “gaiaren inguruan dauden iritzi eta ikuspegi ezberdinak aztertzea” izango da.

Prostituzioaren inguruko eztabaida antolatu dute, eta mundu horretan dauden jarrera ezberdinak aztertuko dituzte. Horretarako, ‘Puteros’ dokumentala proiektatuko dute, ‘zergatik gastatzen dute dirua horretan?’, ‘zer pentsatzen dute?’ edota ‘nola bizitzen diren?’ galderei erantzuna bilatzeko. Proiekzioaren ostean, prostituzioan aritzen diren pertsonekin lan egiten duen Arratsa Elkartearen ordezkari batek zer nolako arazoekin topatzen diren kontatuko du. Herritar guztien artean luzatu dute bertaratzeko deialdia.

Irungo Udaleko Gazteria eta Hezkuntza saileko ordezkari Monica Martinezek hiriko gazteei zuzendutako azken egitasmoaren berri eman du gaur. 13-17 urte bitarteko gazte irundarrek udaran beste herrialde batzuetara bidaiatzeko udalak bideratzen duen laguntza programaren barruan, oraingoan, Polonia eta Errumaniatik etorritako ikasleekin elkartuko dituzte irundarrak.

Besteetan irundarrek Europako herrialdeak bisitatu dituzten bezalaxe, guztira, 30 ikaslek bisitatuko dute Irun. Hamar egunez, txangoak, bisitak, edota bestelako jarduerak egingo dituzte ikasleek. Dies Oiassonis eguna dela eta, hiriko iragan erromanoa ikertuko dute gaztetxoek. Uztailaren 8tik 17ra bitarte bisitatuko dute hiria.

Programan izena emateko, 13-17 urte bitartekoek  hilaren 23tik 27ra bitarte apuntatzeko aukera dute, Igazte-ren bulegoan edota CBA liburutegian, astearte, ostegun eta ostiraletan (11:00etatik 13:30tara) eta astelehen eta asteazkenetan (17:00etatik 19:30tara).