Ate joka dira Irungo San Pedro eta San Martzial jaiak. Izan ere, ostiral honetan hasiko dira jaien aurrekari diren kontzertuak: Izaro eta Camela. Bide horretan, udala prebentzio eta protokolo ezberdinak aurkezten ari da eta gaur hiri barruko autobusetan portaera egokia izateari buruz kontzientziatzekoaren txanda izan da. Borja Olazabal Mugikortasun ordezkariak egin du aurkezpena.

Kanpainari Hurrengo geltokia: errespetua izena jarri diote eta Irunbus Auif enpresako langileen eskarietako bati erantzutea izan dute asmo. Helburua, zerbitzuaren erabiltzaileak sentsibilizatzea da, errespeturik gabeko jokabideak eta gizalegerik gabeko erasoak prebenitzeko eta bizikidetza hobetzeko autobusen barruan. Olazabal ordezkariak azaldu duenez, azken asteetan “arrunta” izan da gidariek erasoei aurre egin behar izatea, “ohi baino gehiago” ohartarazi du.

Beraz, udalak eta Irunbus Auifek indarrak batu eta erabiltzaileen eta gidarien artean “errespetua eta gizalegea” sustatzeko kanpaina ondu dute. Datozen egunetan, berrogeita hamar bat binilo inguru jarriko dituzte hiri barruko autobusen barruan.

Irisgarritasuna hobetzeko lanak egiten ari dira Pio XII plazan eta orain artean egin bezala, bihartik etzidamu arte (hilak 12, 13 eta 14) trafiko mozketa berriak iragarri ditu udalak. Hala, Serpio Mujika kalea hiru orduz itxita egongo da 09:30etik 12:30etara. Bitarte horretan Gipuzkoa etorbidea eta Serapio Mujikaren arteko errepidearen norabidea aldatuko dute, Jose Eginorantz ibilgailuei irteera emateko.

Pio XII plaza, berriz, hiru egunez osorik itxiko dute eta desbideratzea Serapio Mujikatik, Juan Aranatik eta Lopez de Becerratik egin beharko da. Udalak jakinarazi du aldaketa guzti hauek seinaleztatuta egongo direla.