Lapurriturriko informazio puntuak ibilbide gidatu berezia eskainiko du datorren irailaren 8an (igandea da) estreinakoz. Gure lagun zuhaitza izeneko ibilbidea egingo dute parte hartu nahi dutenek.11:00etan abiatuko dute eta ordu eta erdi inguruko iraupena izango duela aurreratu dute. Noski, Lapurriturritik abiatuko dira herritarrak.

Ibilbide honetan informazio puntuaren inguruan dauden zuhaitzak ezagutuko dituzte partaideek oinez, bertako espezieak eta horien ezaugarriak identifikatzen ikasiko dute: enborrak irakurtzen eta zein informazio ematen duten, zein espezie diren sendagarriak, zuhaitzei buruzko kondairak… Horrez gain, zuhaitzek atmosferako CO2 xurgatzeko duten gaitasunaz ere ariko dira, eta kalkulu erraz bat egiteko eskatuko zaie partaideei. Ibilbidea bukatzeko, fitxa bat banatuko diete, etxean zuhaitz bat landatzeko jarraibideekin.

Jarduera adin tarte guztiei irekia da, baina bereziki 8 eta 12 urte bitarteko haurrak dituzten familiei begirakoa da. Izen emateak bihartik (hilak 22) egin daitezke, irailaren 2ra arte.

Bidasoa Atletiko Taldeko (BAT) bi kide Liman (Peru) jokatuko den 20 urte azpikoen Munduko Txapelketan izango dira. Hilaren 26tik 31era bitarte izango dute lehia bi bidasoarrek. Joaquin Alonso eta Arwen Martinez izango dira klubeko ordezkariak.

Alonso hesiz betetako 400 metroko proban ariko da. 50,94 segundoko markarekin, sailkapeneko 14. postuan dago. Hilaren 28an hasiko du lehia.

Martinez, berriz, 100 metroetan eta 4×100 erreleboetan parte hartuko du. Denboraldiko marka onena (11,51 segundo) gainditzen saiatuko da, 27. postuan dago egun. Hilaren 27an hasiko da lehiatzen.

Abel Castañares, munduko bigarren
Pasa den asteburuan Suedian jokatutako Master Munduko Txapelketan ere ordezkari bat izan zuen BATek. Abel Castañares bigarren izan zen, zilarrezko domina eskuratuz. Oztopoz betetako 2000 metroetan aritu zen, oso fin. Helmugara 7:49,85eko denbora egin ondoren iritsi zen.