Rebeka Ubera eta Oskar Matutek Euskal Bidea aurkeztuko dute Kabigorri Ateneoan

Irungo Bilduk datorren astean antolatuko du, Kabigorri Ateneoan, '100 mila kafe' ekimena. Asteartean, martxoak 24, 19.00etatik aurrera, koalizioak aurkeztutako Euskal Bidearen xehetasunak azalduko dira.

Oinatz Mitxelenak gogoratu zuenez, urtarrilean «EH Bilduk Ficoban Euskal Bidea proposamena gizarteratu eta aurkeztu zuen. Herri honen etorkizuna zein izango den irudikatzeko proposamen bat da, ze bide egin nahi dugun gure herria libre izateko». Proposamen hori zabaltzeko Euskal Herri osoan ospatuko den ekimena antolatu du EH Bilduk: '100 mila kafe' izenburuarekin, «Irunera ere iritsiko da. Bertan, Euskal Bidea zer den azaltzeko, Rebeka Ubera eta Oskar Matutek hartuko dute parte», azaldu zuen Oinatz Mitxelenak. Moderatzailea Ihintza Ostolaza izango da.

Bilduko bozeramaileak «hiritar orori» luzatu zien gonbidapena '100 mila kafe' ekimenan parte hartzeko.