Igande honetan, hilak 25, Bidasoko maratoi erdia eta 10K lasterketan egingo dira Irun eta Hondarribia artean, eta horrek, eragina izango du zirkulazioan. Udaltzaingoak honako jakinarazi duenez, eragina izango du bai errepideetan, tren geltokian, San Juango taxi zerbitzuan, hainbat parkingetan eta kaleko hainbat aparkalekuetan.

Errepideak

08.30etik aurrera, ibilgailuak ezingo dira sartu Urdanibia plazatik Junkal karrikara; 08:45etik aurrera Kolon pasealekua itxita egongo da, Gipuzkoa hiribidearen eta Eliza karrikaren artean, bi noranzkoetan. Itzulbidea, aldiz, zabalik egongo da, 09:15etik aurrera.

12:00etara bitartean gutxi gorabehera, ibilgailuak ezingo dira sartu Kolon pasealekura, Hondarribia kalera, Zubimusu plazatxora eta Letxunborro hiribidera. Itzulbidea lasterkarien beroketa ariketen arabera egongo da zabalik, eta hiri barruko autobusek Zubimusu plazatxotik Gipuzkoa hiribideraino zirkulatu ahalko dute.

09:30etik aurrera ibilgailuak ezingo dira sartu Zubimusu plazatxotik erdialdera; 09:45etik 12:30era bitartean gutxi gorabehera, ibilgailuak ezingo dira sartu Urdanibia plazara eta, Osinbiribil eta Behobia artean, GI-636 errepidera; lineako autobusek bakarrik zirkulatu ahalko dute, Donostiarantz, baina, lasterketa dela-eta, baliteke atzerapenak izatea.

Hilerrira sartzeko, ibilgailuek Osinbiribiletik, GI-636 errepidetik eta Artiga ibilbidetik joan beharko dute –Artiga ibilbidean, txandaka pasatuko dira–.

10:10etik aurrera, itzulbidea zabalik egongo da, baina noranzkoa aldatzeko erreia ezingo da erabili. Kolon pasealekuan, autobusentzako errei bat egokituko da, Jenaro Etxeandia plazatik Iparralde hiribideraino, eta, Iparralde hiribidean, autobusak betiko ibilbidea egiten hasiko dira –azken zatia kontrako noranzkoan egingo dute–. Zubimusu plazatxotik Gipuzkoa hiribideraino, hiri barruko garraiorako errei bat egokituko da, Irungo noranzkoan.

Taxi zerbitzua

San Juan plazako geralekua itxita egongo da. Jose Ramon Agirretxeko geralekuan, taxiak Gipuzkoa hiribidetik sartuko dira, eta, horretarako, Luis Mariano kalea erabiliko dute, kontrako noranzkoan, edo Kolon pasealekuko parkinga. Atera, berriz, Joaquin Gamon kaletik aterako dira, kontrako noranzkoan, eta, gero, Pikoketa karrikatik. Luis Marianoko geralekua, berriz, ezingo da beti bezala erabili; alegia, taxiak ezingo dira joan Gipuzkoa hiribiderantz.

Parkingak

Kolon pasealekuan ibilgailuak Gipuzkoa hiribidetik sartu ahalko dira, eta bidegurutzeetako agenteek Elizatxo hiribideko biribilgunetik ere sartzen utziko diete. Atera, berriz, Jose Ramon Agirretxe eta Joaquin Gamon kaleetatik eta Pikoketa karrikatik atera beharko dute –Joaquín Gamón kaletik, kontrako noranzkoan–.

San Juanekoan, plazako bertako sarrera itxita egongo da 08:45etik 12:00etara bitartean, eta Prudencia Arbide karrikakoa, berriz, ohi moduan erabili ahalko da. Mendibilekoan, sarrera normal erabili ahalko da.

Aparkamendua

09:45etik 12:15era bitartean gutxi gorabehera, Nafarroa hiribidean (beheranzko erreian, Dunboa kaleraino), Santa Elena karrikan, Uztapide Bertsolaria kalean, Altzukaitz kalean eta Pelegrín de Uranzu eta Papinea karriketan aparkatuta dauden ibilgailuak ezingo dira atera tokitik.

Gidariek aipatutako orduetan ibilgailua erabili beharrik duten pentsatu beharko dute, eta, behar badute, aipatutako lekuetatik kanpo aparkatu.

Irunbusen ere aldaketak izango dira linea guztietako ibilbideetan lasterketek iraun bitartean. Horiek guztiak udalaren orrialdean kontsulta daitezke.

Hiriko kirol talentua balioan jartzeko eta kirolari onenak saritzeko Kirol Gala egin zuten atzokoan Amaia KZn. Bertan izan zen Borja Olazabal Kirol ordezkaria eta kirolarien lana lehian eta kalean aintzatetsi zituen: “Kirolaren arloan modu altruistan lanean dabiltza pertsonekin, guztiok kirolaz gozatzeko aukera izan dezagun”.

Hirian aztarna utzi duten bi figura nabarmendu zituen jarraian. Batetik, Beñardo Garcia, Bidasoa eksubaloiko presidente historikoa eta 2023ko Hiriko Urrezko Dominaren irabazlea, eta bestetik, Iñaki de Mujika, kirol kazetaritzaren “ahots handienetariko bat, tokiko kirolaren alde lan eskerga egindakoa”.

Sarien banaketa

Lehenik, Irundarren Sarirako nominatu guztiak igo ziren oholtzara eta opari bana eman zieten.

• Klub Onenaren Saria: Mariño-Real Union futbol taldea. Nuria Alzagak banatu zuen saria.
  • Hiriko nesken artean kirola sustatzeko egindako lanagatik, bai lehiari dagokionez, bai eguneroko praktikari lotuta.
• Gizon Kirolari Onenaren Saria: Iñaki Penciña Chambery eskubaloi jokalaria. Ander Montserrat trinketistak eman zion saria.
  • Brontzezko domina irabazi zuten Munduko Eskubaloi Txapelketan.
• Emakume Kirolari Onenaren Saria: Alba Rodriguez borrokalaria. Borja Olazabalek banatu zuen garaikurra.
  • Munduko txapeldunordea eta Espainiako txapelduna izan da bi aldiz, 20 urtetik beherakoen kategorian.
• Txokolatezko Baloia: Alberto Bixio Gorriz. Alkateak eta Olazabalek eman zioten.
  • Futbolean izandako ibilbide oparoa aitortu diote, Realak 1980-1981 eta 1981-1982 denboraldietan lortutako bi ligak lortzeko egindako ekarpenagatik. Talde gipuzkoarrak historian lortu dituen bakarrak.
• Irundarron Saria: Aitzpea Gonzalez, Amaiur Etxeberria, Ainhoa Zapirain eta Naroa Zubimendi.
  • Espainiako txapeldun izan dira arraunean, distantzia luzeko modalitatean, eta bigarren urtez jarraian irabazi dute sari hau.

Kirol arrakastak ez ziren izan kontutan hartutako bakarrak eta kirol profesionaletik erretiroa hartu duten kirolarien ibilbidea omendu zuten. Horrela, Ander Elosegi piraguista olinpikoari aintzatespen berezia eman zion Goizane Alvarez Kiroletako diputatuak.

Julen Aginagalde eskubaloi jokalari ohiari ere eman zioten aitortza saria, Gipuzkoako Kirol Prentsaren Elkarteko presidente Tito Irazustaren eskutik. Eskubaloian egindako “ibilbide bikaina” aitortu diote. Ondoren, Aginagaldek, Ander Ugarte bere taldekideari eman zion aintzatespen berezia.

Sari berezia ere eman zioten Virginia Corchon kirol psikologoari, Genuine Ligako Realeko jokalari irundarrei eta Bidasoa Atletiko Taldeko harrobiari.