Beste urte batez Jaietan Errespetatu kanpaina martxan jarriko du Irungo Udalak sanmartzialetan. Jaiak disfrutatzeko helburuarekin, “bizikidetzari errespetua” eskatu du Miguel Angel Paez alkateordeak, Sergio Javier Herritarren Parte Hartzeko ordezkariarekin batera. Gaur egindako agerraldian Irungo auzo elkarteekin batera agertu dira baita hainbat ostalarirekin batera ere.

Dibertsioa eta errespetua ez direla “etsaiak” dio Javierrek eta bi balio horiek “eskutik helduta” joan behar dutela uste du, “guztiok goza ditzagun jaiak, urteko egunik berezienak dira eta”. Kanpainak oinarrizko aholkuak biltzen ditu, hala nola, komun publikoak erabiltzea, alkohola neurriz hartzea, zaborrontziak erabiltzea eta bizilagunen atsedena errespetatzea. Sergio Javier: “Herritar guztien interesak batu behar dira. Batzuek oso ondo pasa nahiko dute, beste batzuk deskantsatu nahiko dute eta ostalariek errentagarritasuna atera nahiko dio bere negozioari”.

Gaur aurkeztu dute Bioterraren 21. edizioa, eta beste urte batez Ficoban egingo da, ekainaren 7tik 9ra. Aurtengo leloa Konpromiso ekologikoa da, eta guztira 130 enpresa batu eta 50 jarduera baino gehiago egingo dira.

Aktibismoari arreta berezia eskainiko dio azokak. Bide horretan, ekainaren 8an, Ozeanoen Nazioarteko Egunean, Espainiako kostaldeko plastikoen kutsaduraren lehen mapa egin duen Nacho Deanen gonbidatu dute hitzaldia ematera, besteak beste. Egitarau osoa, lotura honetan kontsulta daiteke.

Itsaso bete zientzia sariak

Ekainaren 8an, larunbatez, 17:30etan, Espainiako Estatuko unibertsitateen G9 taldeak sustatutako Itsaso bete zientzia sariak banatuko dizkiete Lehen eta Bigarren Hezkuntzako ikasleei.

Sari horien jatorria Europan dago. Izan ere, Europako Batasunak gaurdanik 2030era arte ezarri dituen egitekoen artean dago gure ur eta ozeanoen osasuna berreskuratzea, ezinbesteko baliabide hori jasangarria eta pertsona guztientzako erabilgarria izan dadin aurrerantzean ere. Unibertsitateen G9 taldeen Kultura Zientifikoko unitateen G9-Science4All proiektuaren xedea da xede hori eta beste batzuk ezagutzera ematea dibulgazio zientifikoaren bidez, gizartearen maila guztietan.

Txapelketan parte hartzen duten gazteek ozeanoen kontserbazioari buruz duten ikuspegia partekatuko dute, eta mezu hori zabaldu beren familien, helduen, irakasleen eta, oro har, gizarteko eragile guztien artean.

Irungo Udal Artxiboak gaur jakinarazi du, bihar, hilak 30, zabalduko dutela Serapio Mugika ikerketa bekaren XVII. edizioaren deialdia. Bekaren helburu nagusien artean, historiaren arloak ikertzeko ohitura zabaltzea dago, baita Irungo udalerriari buruzko tokiko historiari buruzko azterlanak bultzatzea ere. Ondoren, publiko orokorraren artean ezagutarazteko xedea ere badu diru laguntzak.

Bekaren zenbatekoa eurotan 9.000koa da: %30 ematen den unean, %30 aldiaren erdian eta gainerako %40 bekaren bukaeran ematen da, emaitzak aurkeztu eta gero. Udalaren esanetan, Espainiako Estatu osoan bere generoan hobekien ordaintzen denetako diru laguntza bat da.

Historiari lotutako beka honetara Irungo komunitatearen bilakaera historikoa ezagutzen edo iturri historikoak berreskuratzen laguntzen duten ikerketa proiektuak aurkez daitezke. Horiek originalak eta argitaragabeak behar dute izan eta egileak hauta dezake gaia eta aldia. Baldintza guztiak, txosten honetan irakur daitezke.

Bihartik hasita uztailaren 5era bitartean ahalko dira aurkeztu proposamenak, Irungo Udalaren egoitza elektronikoaren bidez. Lana bukatzean, udalak argitaratzeko eskubidea balia dezake.