Abuztua den arren, Irungo Udalak Eguberrietako kanpainaren lehen zertzeladen berri eman du gaur. Bertan izan dira Cristina Laborda alkatea eta Nuria Alzaga Kultura ordezkaria. Alkateak baieztatu du “egonkortutako” kanpaina dela abendukoa eta “erreferente” bilakatu nahi dutela Euskal Herrian.

“Iazko zapore ona errepikatu nahi dugu”, azaldu du alkateak. Izan ere, 2023ko Eguberrietan 20.000 lagunek bisitatu zuten Irun, eta izotz pistetatik eta txirristatik 12.000 pertsona baino gehiago pasa ziren. Pio XIIren karpatik, berriz, 600 lagun inguru pasa ziren.

Aurtengo kanpaina, abenduaren 4an hasiko da eta urtarrilaren 6an bukatu. Egitaraua ez dute argitaratu, baina aurreratu dute “nobedadeak” egongo direla. Hasteko, Eguberrietako argien piztea desberdina izango da eta hirian zehar argi gehiago jarriko dituzte ere.

Nobedadeez gain, urteroko jarduerak eta guneak ere egongo dira. Esaterako, Sarjia parkean Gabonetako herria egongo da, eta berritasun gisa, Eguberrietako zortzi figura eta 25 zuhaitz argiztatuko dituzte. Argiztapen dekorazioa ere jarriko dute eta aurtengoan San Migelen, Pio XIIn, Luis Marianon eta Iparralde hiribidean jarriko dituzte lau irudi argiztatu.

Eguberrietako etxolak

Abenduaren 13tik urtarrilaren 5era arte, Zabaltza plazan egongo da Eguberrietako azoka. Irungo saltokiek irailaren 9tik 27ra bitartean egin beharko dute etxola jartzeko eskaria, Irungo Udalaren egoitza elektronikoaren bidez. Merkataritzarako dohainik izango dela azaldu du udalak, eta aste batean, bitan edo hirutan parte har dezakete.

Auzoko festetako aroak aurrera darrai, eta gaurkoan Arbesko jaiek egingo dute eztanda. Jai Batzordeak publiko guztiak aintzat hartu dituen programazio anitz eta zabala prestatu du festez gozatzeko. Gaur kirola izango da protagonista nagusia. 16:00etan, Real Unionen laguntzarekin, penalti jaurtiketak egingo dituzte 6 eta 12 urte arteko gaztetxoek. Ondoren, 18:00etan, Leka-Enea klubak mahai teniseko txapelketa antolatu du. 19:30etik 20:30era, merienda egingo dute Pizzeria Peccatoren produktuekin, eta bitarte horretan Arbes Bidasoa klubeko judokak omenduko dituzte aurten lortutako emaitza onengatik. Azkenik, eguna biribiltzeko, 21:00etatik 23:00etara txiki dantza jarduera egingo dute Mikeltxi DJarekin.

Festa giroak bihar izango du jarraipena, eta ospakizunak igandera arte luzatuko dira. Lau egunez ez da aspertzeko aukerarik izango Arbesen. Hona hemen programazioa egunez egun:

Auzoetako kultur agenda josi du lehen aldiz Irungo Udalak. Horretarako, Irungo auzo elkarteekin aritu dira elkarlanean, “kalitetezko” kkultura eskaintza egin ahal izateko. Egitarau honen aurkezpena egin dute gaur San Juan plazan eta bertan izan dira Nuria Alzaga Kultura ordezkaria, Sergio Javier Parte Hartzearen ordezkaria edota Juncal susperregi Alde Zaharra San Juan Auzo Elkarteko kidea, eta Auzo Elkarteen Federazioko hainbat ordezkari.

Auzoetara kultura gerturatzearen ideia, 2023ko aurrekontu parte hartzaileetatik dator. Javierren arabera, Irungoa izatea “bere auzokoa izatea ere bada” eta hargatik “albiste ona” da auzo elkarteekin elkarlanean aritzea udal ordezkariarentzat. Esperientzia hau “oso aberasgarria” dela erantsi du Alzagak, eta aniztasuna ardatz duen agenda bat prestatu dutela azaldu du.

Agendaren kartela argitaratu badute ere, soilik aste honetako jardueraren berri eman dute. Hala, Kantujira egingo da Urdanibia plazatik abiatuta ostiral honetan, hilak 30. Ibilbideak San Martzial kaletik jarraituko du Karrika Nagusirantz, eta Foru eta Legia kaleak pasatuz. Jarraian, Benta Zaharreko Mutiko Alaiak taldeak kontzertua eskainiko du.